SMILE Project Health Minister in a hawng
Vawiin khan Social Welfare&Tribal Affairs Department changtu Minister Pi Lalrinpuii chuan Administrative Training Institute Auditorium, MINECO-ah, Aizawl District huam chhunga chhan hrang hrang avanga midangte tanpuina dil thinte tana Sawrkar laipui scheme, Support for Marginalised Individuals for Livelihood and Enterprise (SMILE) project chu khuallian niin a hawng.
Hawnna puala hun hmanah hian khuallian Pi Lalrinpuii, Social Welfare&Tribal Affairs Minister chuan thusawiin, SMILE project a taka Aizawl District-a kalpui a ni thei tur chu lawmawm a tih thu a sawi a. Tun hnai mai khan Mizoram Sawrkar pawhin hemi kaihhnawihah hian hma nasa taka lain Dan te hial pawh a lo siam tawh tih sawiin, chhan hrang hrang vanga hnam dang kutdawh lo lut chiam thei danna turte leh, Mizorama kutdawhte chhawmdawla eizawnna kawng dang buatsaihsak chu Scheme-in a tum a ni tih a sawi a. MFM-in scheme an kalpui thei tur pawh Minister chuan thlamuan thlak a tih hle thu sawiin, MFM chu tlawmngai pawl zingah pawh a rintlak ber pawl an ni tih a sawi a. Mizorama District dang dangah pawh SMILE project chu kalpui chho zel theih a beisei thu a sawi bawk a ni.
He hunah hian Aizawl DC Er. Lalhriatpuia pawhin thusawiin, Aizawl chu Mizorama District thang chak ber leh a cheng mipuite pawh pun chak em emna a ni tih sawiin, hemi rual hian mi harsa leh chhumchhia zawkte, chung harsatna vanga kutdawhte pawh an pung ve zel tih a sawi a. Chutiang mite chhawmdawlna tura Sawrkar laipuiin SMILE Scheme a duang chhuak chu Mizoram tan pawh hmasawnna nasa tak a ni ngei dawn tih a sawi a ni.
Support for Marginalised Individuals for Livelihood and Enterprise (SMILE) project hi Sawrkar laipui chuan harsatna eng eng emaw avang leh loh theih lohna avanga kutdawhte chhawmdawlna turin kum 2022 khan Ministry of Social Justice&Empowerment hnuaiah a kalpui tan a. Mizoramah chuan Aizawl District-ah hian kalpui hmasak ber tur niin, Aizawl Deputy Commissioner Office, Planning and Implementation Department chu implementing authority an ni a; Mission Foundation Movement (MFM) chu Scheme kaihhnawiha hma la tur (implementing agency) an ni bawk a. He project hian, loh theih lohna vanga kutdawh ten Central leh State Sawrkar hnuaia scheme hrang hrangte an chhawr tangkai theih nana hmalak te, zirna leh hriselna bakah eizawnna kawng zawh thei tura thiamthil zirna (skill development training) an meih theihna tura hma lakte a huam ang. Vawiin vek hian Aizawl DC Office leh MFM-te hian he Scheme atana thawhhona thuthlung (MOU) pawh an ziak nghal a ni.
Vawiina hun hman hi Aizawl District Deputy Commissioner, Er. lalhriatpuia chuan kaihruaiin, kalkhawmte lawmna leh Scheme sawi hmawhmuhna hun a hmang a. Pu Lalramchuanzela, Executive Director, MFM hnen atangin Project report ngaihthlak a ni a. Pu Zoramsiama Hmar, Addl. DC, Aizawl chuan lawmthu sawiin hun hi a khar a ni.
Attachment: